Bakı Buxtasında Dəniz Körpüsünün Tikintisi Layihəsinin Texniki–İqtisadi Əsaslandırmasının (TİƏ) hazırlanması üçün Azərbaycan Respublikası ilə Cənubi Koreya Respublikası arasında müqavilə bağlanmışdır. Bakı buxtası üzərindən körpü inşası layihəsinin məqsədi Bakıda nəqliyyat infrastrukturunu təkmilləşdirməkdən, koreyalı mütəxəssislərin hesabına azərbaycanlı mütəxəssislərin dəniz körpüsü və yolların tikintisində təcrübəsini zənginləşdirməkdən ibarətdir. Bakı Buxtasında inşa olunacaq körpü Bakı şəhərinin mərkəzində avtomobil yollarında nəqliyyat yükünün azaldılmasını təmin edəcək və bir neçə istiqamətdə nəqliyyat vasitələrinin hərəkətini asanlaşdıracaq.Quba-Şamaxı yolunun reallaşacağı təqdirdə isə respublikamızın mərkəzi rayonlarından Rusiya Federasiyası sərhədi istiqamətində hərəkət edən avtomobillər təxminən 156 km məsafəyə qənaət etmiş olacaq və həmin istiqamətdə yeni infrastrukturun yaranması ölkənin turizm potensialını da gücləndirəcək. Layihənin başlanğıc hissəsi Bakının cənub-qərbində Yasamal vadisi (dərəsi) adlanan ərazidən, Bakı dairəvi şosse yolunun Badamdar qovşağından başlayır, sonra Badamdar dağının altı ilə (iki tərəfli tunelin qazılması planlaşdırılır) 2,3-2,5 km məsafədə keçərək gərbdə 20-ci sahə yaşayış yerinə çıxır, bu ərazidən və Bibiheybət Neft Mədəni ərazisindən keçərək dəniz hissəyə keçir. Layihə zonası təxminən 700 m məsafədə 20-ci sahə qəsəbəsinin yaşayış zonasından, 1460 m isə neft mədəni ərazisindən keçir. Layihənin son hissəsi Xətai rayonunun Əhmədli hissəsində Zığ şossesinə çıxır. Layihə üzrə Ətarf mühitin və sosial-iqtisadi vəziyyətin qiymətləndirilməsi TİƏ sənədinin əsas elementlərindən biridir. Bu qiymətləndirmələr TİƏ komandasına layihənin Texniki əsaslandırılmasında ətraf mühitə, həssas ərazilərə, social və iqtrisadi sahələrə hər hansı mənfi təsirləri qabaqcadan ğörməyə imkan verəcəkdir. Bu qiymətləndirmələr həm quruda, həmdə dənizdə fiziki, kimyəvi və bioloji ətraf mühit, sosial və iqtisadi vəziyyət, həssas sahələr və onların vəziyyəti barədə tədqiqatların nəticələrini özündə əks etdirir.Bundan əlavə ətraf mühitin çirklənməsinin mövcud vəziyyəti, ətraf mühit sahəsində hüquqi çərçivə, qayda və standartlar araşdırılmışdır.